Ministri në detyrë i Financave, Hekuran Murati, i është përgjigjur kryetarit të Komunës së Prishtinës, Përparim Rama, pas akuzave për bllokimin e buxhetit të Kryeqytetit.
“Përparim, thuaj Lumirit bashkë me deputetët tjerë le ta votojnë buxhetin e Komunës së Prishtinës për vitin 2025 në Kuvend. Kaq e thjeshtë është”, ka shkruar Murati në Facebook.
Ai ka mohuar se Ministria e Financave ka bllokuar buxhetin e Prishtinës, duke theksuar se në situatë të njëjtë gjenden edhe Gjilani e Zubin Potoku, komuna që njësoj sikurse Prishtina nuk kanë arritur ta miratojnë buxhetin brenda afateve ligjore.
Murati ka theksuar se, pavarësisht sqarimeve të përsëritura nga ana e tij, Përparim Rama dhe Shkëmb Manaj kanë vazhduar ta akuzojnë atë për bllokimin e buxhetit të Komunës së Prishtinës, gjë që ai e cilëson si të pavërtetë.
“Normalisht që kjo është e pavërtetë”, ka theksuar ai, duke paralajmëruar se do të ndërmarrë masa ligjore ndaj akuzave. “Jam i detyruar që të dorëzoj padi për shpifje ndaj Përparim Ramës, por edhe kujtdo tjetër që vazhdon të dezinformojë për gjoja vendime për bllokim të buxhetit”, ka shkruar ministri në detyrë.
Reagimi i Muratit vjen pas deklaratave të Ramës, i cili e akuzoi ministrin se me vendime politike po pengon ekzekutimin e buxhetit të Kryeqytetit. Rama ka theksuar se në Prishtinë janë “33 milionë euro të bllokuara, prej tyre 23 milionë të hyra vetanake dhe 10 milionë grant qeveritar”.
