Në një atmosferë solemne dhe plot emocion, në Shtëpinë e Gazetarëve në Zagreb u zhvillua ceremonia përmbyllëse e `Ditëve të Teutës 2025`, të dedikuara humanistes së madhe britanike Edith Durham. Ngjarja shënoi një moment të veçantë për komunitetin shqiptar në Kroaci, pasi u festuan 35 vjet nga themelimi i Shoqatës “Mbretëresha Teuta” dhe 20 vjet nga regjistrimi i saj zyrtar.
Në këtë ngjarje u ndanë Çmimet “Mbretëresha Teuta 2025”, të cilat iu akorduan ish-presidentit kroat Stipe Mesiq, Ministrisë së Arsimit të Kroacisë, Qytetit të Zagrebit, dramaturges së HNK-së Sanja Iviq dhe Nurije Avdiut, mësueses së parë të gjuhës shqipe në Kroaci, për kontributin e tyre në forcimin e miqësisë shqiptaro-kroate dhe promovimin e vlerave kulturore dhe arsimore.
Në ceremoni morën pjesë shumë të ftuar të nderuar, përfshirë ambasadoren e Shqipërisë, Donika Hoxha, përfaqësues të Ambasadës së Kosovës, ish-kryeministren kroate Jadranka Kosor, politikanet Mirana Palikoviq Gruden dhe Gordana Sobol, shkrimtaren Ana Perajica, si dhe personalitete të tjera të njohura nga fusha e kulturës dhe diplomacisë.
Programi artistik u pasurua me ekspozitën e përbashkët të artistëve Albulena Bilalli, Korab Morina dhe Dorian Koçi, ndërsa kumtesat mbi jetën dhe veprën e Edith Durham-it u mbajtën nga Arnand Plaka, Alketa Gashi Fazliu dhe Andrea Feldman.
Mbrëmjen e drejtuan Oreb dhe Alketa Gashi, ndërsa grupi valltar “Illyria” e emocionoi publikun me performanca kushtuar Mbretëreshës Teuta, Nënë Terezës dhe Edith Durhamit.
Skenari, regjia dhe koreografia mbanin firmën e Shenida Bilallit, ndërsa interpretimi i aktorit kroat të njohur Robert Kurbasha i shtoi një dimension të veçantë artistik ngjarjes.
Organizatorët falënderuan të gjitha anëtaret dhe bashkëpunëtorët e Shoqatës për kontributin dhe përkushtimin e tyre, duke theksuar se energjia dhe angazhimi i tyre e kthyen këtë ngjarje në një mbrëmje krenarie, arti dhe miqësie mes popullit kroat dhe atij shqiptar.
