Partia Demokratike e Kosovës ka reaguar pas vendimit të PZAP-it, i cili refuzoi ankesën e saj për parregullsitë në procesin zgjedhor në Mitrovicën e Jugut, duke e quajtur këtë vendim të padrejtë dhe të pambështetur në realitetin e asaj që ka ndodhur.
“Partia Demokratike e Kosovës shpreh zhgënjimin e saj të thellë me vendimin e Panelit Zgjedhor për Ankesa dhe Parashtresa (PZAP), i cili sot ka refuzuar ankesën tonë lidhur me parregullsitë e evidentuara në procesin zgjedhor në Mitrovicën e Jugut. Ne e konsiderojmë këtë vendim të padrejtë dhe të pambështetur në realitetin e asaj që ka ndodhur në Mitrovicë,” tha PDK, duke theksuar se ka paraqitur fakte dhe dëshmi që tregojnë cënimin e procesit zgjedhor dhe mosrespektimin e vullnetit të qytetarëve.
Kjo parti theksoi se nuk do të ndalet dhe do të përdorë të gjitha mekanizmat ligjorë të Republikës së Kosovës.
“Hapi ynë i radhës është paraqitja e ankesës në Gjykatën Supreme të Republikës së Kosovës, e cila është instanca përfundimtare dhe vendimtare për të garantuar drejtësi dhe integritet të procesit zgjedhor,” tha PDK.
PDK shtoi se është në mbrojtje të votës së lirë, të drejtë dhe të pastër të qytetarëve. “Ne nuk kërkojmë asgjë më shumë sesa respektimin e ligjit dhe të vullnetit të shprehur të qytetarëve të Mitrovicës”, theksohet tutje në reagim.
Paneli Zgjedhor për Ankesa dhe Parashtresa ka refuzuar ankesën e Partisë Demokratike të Kosovës, e cila kërkonte përsëritjen e procesit zgjedhor në Mitrovicën e Jugut. Në vendimin e publikuar sot, PZAP konstaton se pretendimet për parregullsi gjatë numërimit të votave nuk janë vërtetuar.
