Shoqata Sindikale e Radio Kosovës i ka kërkuar kryetarit të Kuvendit, Dimal Basha, që të thërrasë një seancë të jashtëzakonshme për Radio Televizionin e Kosovës, i cili ndodhet në gjendjen më të rënduar financiare të viteve të fundit, duke rrezikuar funksionimin bazik të transmetuesit publik.
Sipas njoftimit, që nga muaji tetor RTK ka hyrë në pamundësi totale financiare, dhe punëtorët kanë mbetur pa paga për më shumë se dy javë, duke u përballur me vështirësi të theksuara sociale dhe humane. Ndër ta ka edhe punëtorë me sëmundje të rënda, përfshirë sëmundje malinje, të cilët nuk arrijnë të sigurojnë as medikamentet bazë.
Shoqata thekson se, sipas Ligjit nr. 08/L-332 për ndarjet buxhetore për vitin 2025, kësti i dytë i mjeteve për RTK-në mund të ekzekutohet vetëm pas vendimit të Komisionit për Buxhet, Punë dhe Transfere. Për shkak të moskonstituimit të këtij komisioni, fondet janë bllokuar, duke e lënë transmetuesin publik pa mundësi operimi normal.
Në këtë situatë, Shoqata ka kërkuar që më së largu nesër, të mbahet mbledhje urgjente e Kryesisë së Kuvendit dhe të caktohet një seancë e jashtëzakonshme, me të vetmen pikë të rendit të ditës: formimin e Komisionit për Buxhet, Punë dhe Transfere, për të mundësuar zhbllokimin e mjeteve të parapara për RTK-në.
Shoqata paralajmëron se mungesa e buxhetit ka paralizuar pothuaj tërësisht funksionimin e mediumit publik, duke ndërprerë shërbime bazike dhe grumbulluar obligime, dhe e ka çuar RTK-në drejt një kolapsi me pasoja të pariparueshme për shërbimin publik, demokracinë dhe të drejtën e qytetarëve për informim të pavarur.
Shoqata Sindikale i ka bërë thirrje të gjitha subjekteve politike në Kuvend të tregojnë përgjegjësi institucionale dhe të kontribuojnë në zhbllokimin e buxhetit, ndërsa paralajmëron vijimin e protestave dhe grevave të përditshme në rast të mosveprimit.
