Kryetari i Lidhjes Demokratike të Kosovës, Lumir Abdixhiku, ka deklaruar se Lëvizja Vetëvendosje nuk i ka votat e nevojshme për formimin e Qeverisë së re, duke e akuzuar për humbje kohe dhe mungesë të vullnetit për zgjidhjen e krizës politike. Ai tha se VV-ja e ka shfrytëzuar afatin kushtetues vetëm për “shfaqje teatrale”, pa bërë asnjë përpjekje reale për të siguruar mbështetje parlamentare.
Abdixhiku theksoi se në 15 ditët e fundit nuk ka pasur asnjë kontakt ose iniciativë nga Vetëvendosje drejt partive tjera politike. Ai u shpreh se gjithë procesi është përdorur për qëllime elektorale dhe për krijimin e kundërshtarëve imagjinarë.
Sipas tij, mbajtja e seancës së fundit vetëm sa e ka thelluar krizën institucionale.
Në deklaratën e tij, ai tha se “është fatkeqësi që Kosovës, në këtë krizë, i janë humbur 15 ditë, dhe as nuk është bërë ndonjë përpjekje për të zgjidhur çështjet emergjente”.
Abdixhiku shtoi se tashmë nuk pret zhvillime të tjera nga VV-ja, përveç thirrjes së presidentes për caktimin e datës së zgjedhjeve të reja parlamentare.
