Nënkryetarja e Kuvendit nga radhët e Vetëvendosjes, Albulena Haxhiu ka thënë se partitë opozitare janë në gjendje ta fusin vendin në krizë, vetëm për inatin, që sipas saj e kanë me LVV-në e Albin Kurtin.
Ajo tha se sot ka pritur të kenë qasje ndryshe, meqë siç tha buxheti i Republikës nuk është i kryeministrit në detyrë Kurti, por i qytetarëve me një shifër, sipas saj, si kurrë më parë, rreth 4 miliard euro.
“Sot prita të kenë sot qasje ndryshe. Buxheti i shtetin nuk është buxhet i kryeministrit Kurti,a i është proceduar nga qeveria në detyrë, në përputhje me Ligjin për Qeverinë është buxhet i qytetarëve që arrin shifrën si kurrë më parë, pra rreth 4 miliard euro, por edhe përkundër kësaj, këta janë në gjendje ta fusin vendin në krizë sociale, t’i lënë qytetarët pa paga, t’i lënë pensionistët pa pensione, shumë familje pa ndihmën sociale, FSK-në e Policinë pa paga, gjithë sektorët e edhe shëndetësinë pa paga, vetëm për shkak të inatit që kanë me Kurtin e Lëvizjen Vetëvendosje”, tha ajo.
Ajo i ka drejtuar lutje partive të tjera parlamentare që të jenë në seancë për t’i votuar dokumentet me rëndësi, por edhe mandatarin në mënyrë që të shmangen dy palë zgjedhje brenda një periudhe të shkurtër.
“Sot i bëj lutje që të kenë qasje pozitive, që ta mendojnë interesin e shtetit, qytetarëve të Kosovës dhe të jenë në seancë për të votuar dokumentet që janë shumë të rëndësishme, por në anën tjetër tash pas pak minutash e kemi votimin e mandatarit. Glauk Konjufca është personi i dytë më i votuar në Republikën e Kosovës. Ata gjithmonë e kanë përmendur Konjufcën si personi unifikues. Pra, sot është momenti t’i japin mbështetje atij. Nuk kemi nevojë të shkojmë ne dy palë zgjedhje për një kohë të shkurtër”, tha ajo.
