Situatë më e rëndë nga vërshimet është paraqitur në Komunën e Ferizajt, përkatësisht në Rakaj, ku ekipet emergjente kanë evakuuar disa banorë për shkak se uji i ishte futur nëpër shtëpi.
Shtëpia e Bashkim Lokut nga fshati Rakaj u vërshuan nga uji për çka i janë shkaktuar dëme materiale
“Këtu ka qenë shumë katastrofë krejt ujë ka qenë tek komshiut tek unë më brenda jashtë ka qenë katastrofë uji brenda ka hyrë. Dëmet materiale janë bërë në të gjithë shtëpinë”, ka thënë Loku.
Në komunë thanë se ekipet përkatëse po bëjnë intervenimet në hapjen e kanaleve për të tejkaluar këtë situatë të krijuar nga vërshimet
“Situatën e kemi nën kontroll për momentin tani jemi duke intervenuar në disa vende ku është gjendja më e rënd dhe ku ka nevojë për intervenim të hapjes së disa kanaleve për zbrazjen e ujit ku është grumbulluar”, ka thënë Skender Kurti, zyrtar i Drejtorisë së Shërbimeve Publike dhe Emergjencë në Ferizaj.
Për shkak të vërshimeve, rruga Ferizaj-Gjilan, pjesë afër kampit Bonstill në Sojevë është mbyllur për qarkullim dhe është apeluar tek të gjithë qytetarët që të gjejnë rrugë alternative për qarkullim deri në një njoftim tjetër.
