Armend Zemaj nga Lidhja Demokratike e Kosovës, pas dështimit që të zgjidhet, Glauk Konjufca kryeministër i ri i Kosovës, tha se vendi po shkon drejt zgjedhjeve. Bëri thirrje që presidentja e shtetit të respektojë afatet kushtetuese e sipas tij të mos lejojë askush të ndikojë në vendimmarrjen e saj.
Ai e quajti lojë të VV-së at që prej prillit sipas tij kishte deklaruar se i ka numrat në Kuvend.
“Është lajm i keq, por ka qenë indikative se kjo do të ndodhë. Ata që nuk kanë pranuar dhe i kanë mashtruar qytetarët se i kanë numrat, është LVV. Nga përfundimi i zgjedhjeve të 9 shkurtit, këta kanë deklaruar se e kanë shumicën, e atë shumicë u dëshmua që nuk e kanë pasur e nuk e kishin as sot. Fatkeqësisht edhe me një elaborim ta quaj kështu tepër fyes për qytetarët e Kosovës ku më shumë u kërkua një qeveri kalimtare, ajo e cila u shpërfill si diskutim që ishte propozim i LDK-së, se sa për një qeveri të rregullt me mandat që i shpërben qytetarëve dhe interesave të tyre”, deklaroi Zemaj.
Ai tha se emri i përveçëm i kësaj bllokade sot e mori përgjigjen edhe me votë në Kuvendin e Kosovës .
“E thërrasim edhe presidenten të respektojë afatet kushtetuese e të mos lejojë asnjë ndërhyrje të kujtdo qoftë në vendimmarrjen e saj”, deklaroi Zemaj.
Ai tha se nuk ka kuptim më asnjë seancë tjetër pas dështimit për zgjedhjen e qeverisë së re.
“Çdo thirrje është tendencë për manipulim ,kamuflim, mashtrim dhe tendencë të krijojnë imazhin e ndonjë fajtori”, tha ai.
