Ndërsa Rusia përpiqet të rekrutojë mjaftueshëm burra për të ushqyer makinën e saj të luftës, Kremlini po rrit stimujt financiarë për të rinjtë që të regjistrohen. Siç pritej, kjo ka çuar në abuzim financiar.
Disa gra ruse – të etiketuara si “Vejusha të Zeza” nga shtypi rus – duket se po martohen me ushtarë të mobilizuar ose po u bëjnë presion partnerëve të tyre civilë që të rekrutohen për të kërkuar kompensim shtetëror kur vriten në Ukrainë, raportoi të hënën Foreign Policy .
Një furnizim i vazhdueshëm me ushtarë të rinj është thelbësor për strategjinë ushtarake ruse ne perpjekje për të sfiduar mbrojtjen e Ukrainës përmes trupave. Duke u përpjekur të ruajë nivelin e rekrutimit të nevojshëm për këtë, Kremlini ka investuar gjithnjë e më shumë burime financiare për ta bërë plagosjen ose vdekjen në shërbim të të ashtuquajturit “operacion special ushtarak” të Rusisë të duket si një opsion tërheqës.
Që nga viti 2025, vlera e grobovye-ve (ose “parave të arkivolit”) që i jepen familjes së një ushtari rus që vdes në Ukrainë mund të jetë deri në 13 milionë rubla (160,000 dollarë).
Një grua e cila punonte në një zyrë rekrutimi ushtarak, u martua me një burrë që u rekrutua një ditë pas dasmës së tyre. Ajo kërkoi më shumë se 3 milionë rubla (37,000 dollarë) nga shteti kur ai u vra në Ukrainë katër muaj më vonë – por një gjykatë ruse vendosi përfundimisht se martesa ishte “fiktive” pasi kunati i saj t e kundërshtoi pretendimin e saj.
Në një rast tjetër, një agjente pasurish të paluajtshme i këshilloi klientët e saj të martoheshin me ushtarë të dërguar në Ukrainë, në mënyrë që të siguronin para të mjaftueshme për pagesat fillestare të pronave të saj pas vdekjes së tyre. Sipas Meduzës , ajo e përshkroi këtë këshillë si një “plan biznesi”.
Ekzistojnë gjithashtu disa prova për të ashtuquajturat “Vejusha të Zeza” që veprojnë si pjesë e bandave kriminale. Katër persona u arrestuan në Siberi në maj të këtij viti, sipas mediave ruse – vetë gruaja, një oficere policie e korruptuar që identifikoi objektivat e saj dhe dy të tjerë. Gruaja, “Natalia”, thuhet se u martua dhe kërkoi kompensim shtetëror për vdekjen e katër burrave të ndryshëm.
