Prokuroria Speciale e Republikës së Kosovës ka reaguar sot ndaj deklarimeve të disa anëtarëve të Këshillit Prokurorial të Kosovës (KPK), duke i quajtur të pasakta pretendimet se Kryeprokurori i PSRK-së ka ndikuar në proceset vendimmarrëse të këtij institucioni.
Në njoftimin e saj, Prokuroria Speciale thekson se as institucioni dhe as Kryeprokurori nuk kanë ushtruar dhe as nuk mund të ushtrojnë ndikim në çështjet që janë kompetencë ekskluzive e KPK-së. Sipas PSRK-së, çdo përpjekje për ta përfshirë këtë prokurori në debatet e brendshme të Këshillit dëmton integritetin e tërë sistemit prokurorial.
“Kryeprokurori, z.Blerim Isufaj, mbetet i përkushtuar që të ushtrojë mandatin në krye të Prokurorisë Speciale, duke përjashtuar çdo pretendim për ushtrimin e ndonjë pozite tjetër, çka dëshmohet edhe me emërimin e një prokurori nga Zyra e Kryeprokurorit të Shtetit në pozitën e ushtruesit të detyrës së Kryeprokurorit të Shtetit”, thuhet në reagim.
Në fund, Prokuroria Speciale riafirmon angazhimin e saj për të vazhduar përmbushjen e detyrave me pavarësi të plotë, në shërbim të interesit publik, me përkushtim dhe transparencë.
Kujtojmë se përplasjet në Sistemin Prokurorial kanë ardhur pas shkarkimit të Besim Kelmendit, nga detyra e ushtruesit të detyrës së Kryeprokurorit të Shtetit. E një anëtar i KPM-së, Visar Krasniqi përgjegjës për shkarkimin e Kelmendit e bëri kryeprokurorin e Prokurorisë Speciale, Blerim Isufajn.
Pas shkarkimit të Kelmendit ka reaguar Zyra e BE-së, e cila thotë se me këtë veprim pengohet reforma e nevojshme e KPK-së dhe progresi i Kosovës në rrugën drejt BE-së. Ndërsa IKD ka vlerësuar se shkarkimi i u.d. Kryeprokurorit të Shtetit është tentativë e qartë për ruajtjen e strukturës korporatiste në KPK.
Në mbledhjen e djeshme të Këshillit Prokurorial të Kosovës, anëtarja e Këshillit, Jehona Grantolli propozoi si rend dite shkarkimin e ushtruesit të detyrës së Kryeprokurorit të Shtetit, Besim Kelmend pas intervistimit të tij për masakrën e Reçakut. Për shkarkimin e tij votuan pesë anëtar të KPK-së.
