21 Nëntori shënon Ditën Ndërkombëtare të Televizionit, e cila simbolizon komunikim dhe globalizimin në botën bashkëkohore. Mirëpo, kjo ditë, Radio Televizionin e Kosovës, transmetuesin e vetëm publik në Republikën e Kosovës, e gjen në gjendje të rëndë financiare. Pa buxhet, punëtorët e RTK-së, ende nuk i kanë marrë pagat e muajit tetor.
“Kuvendi i Kosovës u shpërbë të enjten. Me këtë humbi edhe mundësia që Radio Televizionit të Kosovës t’i alokohet pjesa e mbetur e buxhetit. Tani e vetmja mundësi është që qeveria në detyrë të bëjë zgjidhje, qoftë përmes kredisë apo mundësive të tjera për transmetuesin e vetëm publik në vend”.
Njohësit e mediave në vend kanë shprehur revoltën e tyre për situatën e krijuar në RTK. Imer Mushkolaj, për këtë situatë akuzon politikën.
“Tash e tri javë punëtorët e RTK-së nuk I kanë marrë pagat e tetorit. Jo për fajin e tyre, por të politikës. Kuvendi është shpërndarë dje, ndërkaq përbërja e re merr kohë të konstituohet. Qeveria në detyrë duhet të gjejë zgjidhje urgjente për 700 punëtorët, të cilët nuk po kërkojnë gjë tjetër veç pagave që ju takojnë me ligj. Paga, me të cilat mbajnë familjet. Mbi kurrizin e tyre dhe me dinjitetin e tyre nuk duhet të bëhet politikë. As fushatë. Loja politike më RTK-në është poshtërsi, është krim. Krim me paramendim”, tha Mushkolaj.
Reagime pati edhe nga njohës të çështjeve të ekonomisë. Safet Gërxhaliu tha se RTK është e Republikës së Kosovës, dhe bëri thirrje që ajo të mos dëmtohet për shkak të politikës.
“Kjo krizë financiare nuk është vetëm problem i punëtorëve, por një çrregullim që prek sektorë të tërë dhe funksionimin normal të institucionit publik të informimit. Nëse në një të ardhme të afërt RTK mund të ketë mundësi anëtarësimi në EBU, mungesa e buxhetit tregon joseriozitetin e Kosovës në sytë e organizatave ndërkombëtare dhe dëmtohet imazhi i shtetit tonë. Është koha që përgjegjësia të merret seriozisht dhe të veprohet menjëherë”, tha Gërxhaliu.
Për gjendjen në RTK, ka reaguar edhe kryetari i Partisë Demokratike, Bedri Hamza, duke vënë në pah se kjo çështje mund të zgjidhet nëse ka vullnet.
“Ka mundësi edhe ligjore për pagat në RTK, nëse kanë vullnet”, tha Hamza.
RTK gjatë ditës ka provuar të marrë një qëndrim nga qeveria në detyrë lidhur me këtë çështje por deri në momentin kur po raportojmë, nuk janë përgjigjur.
