IZRAELI raportoi se një komandant ushtarak i Hezbollahut u vra në një sulm në periferitë jugore të Bejrutit dhe se objektivi i sulmit ishte një ndërtesë banimi në një zonë me popullsi të dendur, në të cilën, sipas informacionit nga autoritetet libaneze, u vranë edhe pesë persona.
Ai është zyrtari më i lartë i Hezbollahut i vrarë pas përfundimit të luftës midis lëvizjes pro-iraniane dhe Izraelit pothuajse një vit më parë.
Ushtria izraelite njoftoi të dielën në mbrëmje se në sulmin e pestë në pjesën jugore të qytetit që nga fillimi i armëpushimit, ku ndodhet fortesa e Hezbollahut, vrau Haitham Ali Tabatabai, i cili konsiderohet “shefi i shtabit” të Hezbollahut.
Sulmi një javë para vizitës së Papës
Një burim pranë Hezbollahut konfirmoi për AFP-në informacionin në lidhje me vdekjen e tij. Tabatabai u gradua në komandant ushtarak të Hezbollahut pas vdekjes së udhëheqësve më të lartë ushtarakë të lëvizjes gjatë luftës me Izraelin.
Sulmi ndodhi vetëm një javë para vizitës së planifikuar të Papa Leo XIV në Liban më 30 nëntor.
Në lagjen me popullsi të dendur që ishte cak i sulmit, kati i tretë dhe i katërt i një ndërtese nëntëkatëshe u goditën nga shpërthimi dhe disa makina u dogjën përpara ndërtesës, raportoi një gazetar i AFP-së në vendngjarje.
Sipas të dhënave të Ministrisë së Shëndetësisë libaneze, pesë persona u vranë dhe 28 u plagosën.
