Ministri në detyrë i Financave, Hekuran Murati, i është drejtuar kryetarit të Lidhjes Demokratike të Kosovës (LDK), Lumir Abdixhikut, lidhur me mosvotimin e buxhetit të Komunës së Prishtinës për vitin 2025.
Përmes një postimi në Facebook, Murati tha se “po ta kishit votuar buxhetin e Prishtinës në seancën e fundit, sot Komuna e Prishtinës do ta kishte në dispozicion buxhetin e plotë dhe fare s’do të kishte probleme me buxhet”.
“Por ju vendosët që betejën politike ta bëni në kurriz të qytetarëve duke mos e votuar buxhetin”, ka shkruar Murati.
Ai i ka kërkuar Abdixhikut t’u shpjegojë qytetarëve arsyen e këtij vendimi, duke theksuar se bllokimi i buxhetit dëmton funksionimin normal të komunës dhe projektet e planifikuara për vitin e ardhshëm.
