Ministri në detyrë i Financave, Hekuran Murati, ka deklaruar se Komuna e Prishtinës nuk ka kryer pagesat e nevojshme edhe pse Thesari ka alokuar me kohë buxhetin e muajit dhjetor.
Sipas Muratit, Thesari ka bërë alokimin të premten pasdite, më herët sesa zakonisht, për t’i mundësuar komunës pagesën e faturave të shërbimeve esenciale, përfshirë energjinë elektrike. Ai ka thënë se, megjithatë, stafi komunal ka përfunduar orarin e punës dhe nuk ka ekzekutuar asnjë pagesë, duke njoftuar se pagesat do t’i kryenin të hënën.
“Fillimisht u habita, sepse kjo sjellje nuk përkonte me urgjencën që kishin paraqitur kur kërkuan alokim të parakohshëm,” ka shkruar Murati në një postim në Facebook.
Ai ka thënë se kryetari i Prishtinës, Përparim Rama, dhe nënkryetarët e komunës gjatë fundjavës janë marrë me “propagandë anti-qeveri”, duke pretenduar se pagesat ishin bllokuar nga Qeveria, ndërsa sipas tij, pagesat mund të ishin kryer të premten.
Murati ka shtuar se ky veprim lidhet edhe me votën kundër të deputetëve të LDK-së për buxhetin e Prishtinës në Kuvend, duke pretenduar se opozita po krijon artificialisht kriza në mungesë të kauzave reale.
