Ministri në detyrë i Financave, Punës dhe Transfereve, Hekuran Murati, në konferencën për medie tha se ka takuar përfaqësues të Sindikatave dhe u ka sqaruar se kriza në transportin publik është e vetëshkaktuar nga Komuna e Prishtinës, pavarësisht faktit nëse buxheti për vitin 2025 do të ishte miratuar apo jo.
“Ka pasur vendime elektorale për të liruar nga pagesa shumicën e kategorive të qytetarëve. Barrën e ka marrë komuna në një kohë kur nuk ka pasur buxhet të miratuar. Kryetari, për shkak të vendimeve elektorale, e ka futur komunën në obligime pa mbulesë dhe tash ka vështirësi për t’i paguar këto fatura”, deklaroi Murati.
Sipas tij, pos trafikut urban, komuna ka futur në vështirësi edhe operatorët privatë të transportit.
“Problemi i dytë është se komuna nuk e ka miratuar buxhetin, dhe as buxheti i shtetit nuk u votua në Kuvend, sepse edhe LDK-ja mungoi. Ky mosvotim e bëri problemin e Prishtinës të pariparueshëm”, shtoi Murati.
Ai tha se për herë të parë në këtë situatë në vështirësi kanë hyrë edhe operatorët privatë të transportit.
Murati akuzoi udhëheqjen komunale se po përdor qytetin dhe institucionet e tij si mjet për betejë politike.
“E vërteta politike, me sa po duket, ka vendosur të marrë peng qytetin, komunën dhe qytetarët, për të bërë betejë politike në mungesë të kauzave të vërteta”, tha ai.
Murati rikujtoi se, sipas tij, vetëm para dy javësh kryetari i Prishtinës kishte deklaruar se do të transformohej transporti publik, ndërsa sot, siç tha ai, nga “transformimi” është kaluar në “bankrotim”.
“Po shihet se si është shtyrë përpara propaganda. Në mungesë të kauzave politike po keqpërdoret situata, madje duke u mohuar qytetarëve shërbime publike dhe duke u përpjekur që për këtë të fajësohet Qeveria qendrore apo Ministria e Financave”, theksoi Murati.
