Qeveria e Kosovës ka njoftuar këtë të martë, se ka miratuar kërkesën e Ministrisë së Financave, Punës dhe Transfereve për kursime dhe ndarje. Por, sipas Asociacionit të Gazetarëve të Kosovës, ky vendim në vlerë mbi 8 milionë euro vlen vetëm për Shërbimin Klinik Spitalor Universitar të Kosovës.
Me këtë rast, AGK-ja ka shprehur zhgënjim të thellë që ky vendim nuk përfshin edhe Radiotelevizionin e Kosovës, ashtu siç kishte premtuar një ditë më parë, Ministri në Detyrë i Financave, Hekuran Murati.
“Teksa jemi në fund të nëntorit, dhe 700 punonjësit e RTK-së ende presin pagën e tetorit, AGK-ja i bën thirrje urgjente Qeverisë së Kosovës që të gjejë formën ligjore për të ndarë buxhetin për RTK-në, për tre mujorin e fundit të 2025. Qeveria e Kosovës duhet të marrë parasysh urgjencën e zgjidhjes së problemit financiar të RTK-së, dhe rëndësinë e funksionimit të Transmetuesit Publik pa ndërprerje dhe pengesa”, thuhet në komunikatën e AGK-së.
Ndërkohë, ky asociacion ka thënë se solidarizohet dhe i jep përkrahje të plotë kolegëve të RTK-së që kanë hyrë në grevë të përditshme, deri në realizimin e kërkesës për bartjen e buxhetit.
