25 nëntori nuk është vetëm një datë në kalendar. Është një kujtesë kolektive se sa shumë punë duhet bërë ende. Në Kosove , dhuna me bazë gjinore eshte prezente me shifra jo te vogla. Pas çdo numri fshihet një histori, një liri e mohuar dhe një kosto sociale që, si komunitet, e paguajmë të gjithë.
Me kete rast presidentja e Kosovës, Vjosa Osmani, ka reaguar në Ditën Ndërkombëtare për Eliminimin e Dhunës ndaj Grave, duke theksuar se femicidi vazhdon të jetë një plagë e hapur dhe një krizë kombëtare që po gërryen shoqërinë.
Ajo ka komentuar rastin tragjik në Gadime të Ulët, ku një grua, edhe pse e mbrojtur me urdhër aktiv, u sulmua me sëpatë nga ish-bashkëshorti i saj.
“Kur një urdhër mbrojtjeje mbetet letër, atëherë rreziku bëhet realitet. Dhe realiteti na vret”, ka shkruar Osmani.
Presidentja ka theksuar rëndësinë e zbatimit të ligjit dhe reagimit të shpejtë nga institucionet.
“Numri i rasteve të dhunës ndaj grave dhe dhunës në familje po na e thotë troç: letrat nuk shpëtojnë jetë. Zbatimi, vendosmëria, reagimi pa vonesë – po!”, ka theksuar ajo.
Osmani ka bërë thirrje për veprim konkret ndaj dhunës, duke theksuar se “çdo hap i gabuar, çdo neglizhencë, çdo vonesë mund të jetë fatale. Sipas Osmanit, askush që ushtron dhunë nuk duhet të ndihet i paprekshëm dhe asnjë grua nuk duhet të mbetet e pambrojtur.
“Nuk ka kompromis kur bëhet fjalë për jetën dhe dinjitetin e grave”, përfundoi Presidentja.
