Kuvendi Komunal i Prishtinës ka miratuar sot bartjen e të hyrave vetanake, një vendim që pritet të mundësojë zhbllokimin e pagesave të ngecura për shërbimet esenciale publike në kryeqytet.
Pas këtij vendimi ka reaguar ministri në detyrë i Financave, Punës dhe Transfereve, Hekuran Murati. Ai tha se votimi i asamblistëve të Lëvizjes Vetëvendosje ka hapur rrugë për realizimin e obligimeve komunale, duke theksuar se një veprim i tillë nuk ishte bërë më parë në Kuvendin e Republikës së Kosovës nga LDK-ja dhe kryetari i saj, Lumir Abdixhiku.
“Pra atë që nuk e bëri Lumir Abdixhiku dhe LDK-ja në Kuvendin e Republikës së Kosovës, e bëri Lëvizja Vetëvendosje në Kuvendin Komunal, për të zhbllokuar pagesat për shërbimet esenciale publike. Sepse, siç është vërtetuar tash e sa herë, për Lëvizjen Vetëvendosje interesat e qytetarëve çdoherë kanë prioritet”, ka deklaruar Murati.
Komuna e Prishtinës pritet të procedojë me ekzekutimin e pagesave dhe me stabilizimin e funksionimit të shërbimeve publike pas këtij vendimi.
