Dy anije cisterna u goditën sot në Detin e Zi, duke shkaktuar që ato të përfshiheshin nga flakët, njoftuan autoritetet turke, dhe raportet tregojnë se anëtarët e ekuipazhit të të dy anijeve janë të sigurt.
Në bazën e të dhënave OpenSanctions, e cila përfshin individë ose organizata të përfshira në anashkalimin e sanksioneve, dy anijet cisternë përshkruhen si pjesë e “flotës në hije” të Rusisë, emri për anijet e përdorura nga Moska për të shmangur sanksionet e vendosura për shkak të pushtimit të Ukrainës.
Autoritetet turke njoftuan se anija cisternë “Kairos”, e cila po lundronte bosh nën flamurin e Gambisë drejt portit rus të Novorossiysk, u përfshi nga flakët kur ndodhej 45 kilometra larg bregdetit të provincës turke të Kocaelit. Autoritetet turke fajësuan “ndikimin e jashtëm” për zjarrin, pa dhënë detaje.
Rreth një orë më vonë, autoritetet turke njoftuan se tankeri i dytë , “Virat”, u godit në Detin e Zi, kur ndodhej 65 kilometra larg bregdetit turk. Ata nuk dhanë detaje të tjera.
Autoritetet turke thanë se të 20 anëtarët e ekuipazhit të Virat ishin të sigurt, megjithëse u raportua tym i dendur në dhomën e motorëve.
Guvernatori i Provincës Kocaeli, Ilhami Aktas, tha se të 25 anëtarët e ekuipazhit të “Kairos” u evakuuan në mënyrë të sigurt.
Aktas nuk donte të komentonte mbi shkakun e zjarreve, ose nëse anijet cisternë mund të jenë goditur nga minat detare, por tha se autoritetet do të lëshonin një “deklaratë më të qartë” pasi të përfundonte hetimi.
Në janar, SHBA-të e futën cisternën “Virat” në “listën e zezë”, dhe Bashkimi Evropian (BE), Zvicra, Britania e Madhe dhe Kanadaja bënë të njëjtën gjë, sipas të dhënave nga faqja e internetit Opensenkshns. Cisterna “Kairos” ka qenë nën sanksione të BE-së, Britanisë së Madhe dhe Zvicrës që nga kjo verë.
