Ish-deputeti i Lidhjes Demokratike të Kosovës, ish-ministri e ish kryetari i Podujevës, Agim Veliu i cili në zgjedhjet e kaluara nuk ishte përfshirë në listën për deputet nga LDK-ja, e ka quajtur të padrejtë e të dëmshëm vendimin e asaj kohe, por tash ka kërkuar publikisht të jetë pjesë e listës për zgjedhjet e 28 dhjetorit, pasi siç ka shkruar ai, shumë aktivistë kanë kërkuar kthimin e drejtësisë.
“Është e vërtetë se edhe në zgjedhjet e kaluara ka ekzistuar pritja që të jem pjesë e listës. Por, pavarësisht vendimeve të padrejta e të dëmshme të asaj kohe, unë kam vazhduar të qëndroj aty ku kam qenë gjithmonë, në shërbim të LDK-së, të qytetarëve dhe të vlerave që kemi kultivuar për më shumë se tri dekada”, ka shkruar Veliu.
Ai ka thënë se përfshirja në listë nuk është favor dhe as privilegj personal.
“Për mua dhe për secilin që ka dhënë kontribut të gjatë në LDK, është vetëm përgjegjësi dhe vazhdimësi e punës së bërë me përkushtim, është respekt ndaj historisë sonë dhe ndaj qytetarëve që na kanë besuar për shumë vite. LDK është shtëpia jonë e përbashkët. Ajo është ndërtuar me mund, sakrificë dhe besnikëri nga njerëzit që ishin aty kur ishte më së vështiri dhe që vazhdojnë të jenë aty edhe sot”, ka shkruar tutje Veliu në shkrimin e tij në rrjete sociale.
Ai ka thënë se është e domosdoshme që dera të mos u hapet atyre që nuk kanë qenë pjesë e LDK-së, nëse kjo, sipas tij, do të ishte arsyeja të lihen jashtë ata që e kanë themeluar, e kanë mbrojtur dhe e kanë mbajtur gjallë partinë për më shumë se 30 vite.
“Respekti për bazën, për themeluesit dhe për kontribuuesit afatgjatë nuk është vetëm parim, është detyrim moral dhe institucional ndaj LDK-së, ndaj anëtarësisë dhe ndaj qytetarëve që na besojnë. Pavarësisht debateve të ditëve të fundit, unë mbetem i përkushtuar ndaj vlerave të LDK-së, i gatshëm ta jap kontributin tim dhe besnik ndaj secilit anëtar që e ka dashur dhe e do partinë si shtëpinë e vet”, ka shkruar Veliu.
