Me debate të ashpra po zhvillohet mbledhja e Këshillit Prokurorial të Kosovës (KPK). Në këtë mbledhje po merr pjesë edhe Agron Qalaj, i cili pak ditë më parë u emërua ushtrues detyre i kryeprokurorit të shtetit, pas shkarkimit të Besim Kelmendit. Mirëpo, pjesëmarrja e tij është kundërshtuar nga një pjesë e anëtarëve të KPK-së.
Disa prej anëtarëve kërkuan që Qalaj të mos marrë pjesë në mbledhje, duke ngritur dyshime për legjitimitetin e pranisë së tij. Me këtë rast, u paraqit edhe propozimi për shkarkimin e kryesuesit të KPK-së, Ardian Hajdaraj. Propozimi u bë nga Visar Krasniqi, i cili e vuri në pikëpyetje ligjshmërinë e shkarkimit të Kelmendit në mbledhjen e kaluar.
“Në takimin paraprak, a ka qenë në rend dite propozimi për shkarkimin e z. Kelmendi? Meqenëse po bën që në mënyrë arbitrare, pa asnjë procedurë, të shkarkohet një anëtar i Këshillit, atëherë propozimi im është shkarkimi juaj nga pozita e anëtarit të KPK-së, që automatikisht nënkupton edhe largimin nga pozita e kryesuesit”, deklaroi Krasniqi.
Ai kërkoi edhe largimin e Qalajt nga salla, duke theksuar se ai është “person i paautorizuar” dhe se prania e tij po e pamundëson zhvillimin e rregullt të mbledhjes. “Ky proces ka marrë rrugë gjyqësore. Sot ka shkuar në Gjykatën Supreme, dhe me automatizëm ankesa në Supreme pezullon çdo veprim tjetër”, shtoi ai.
Edhe anëtari tjetër, Veton Shabani, paralajmëroi pasoja ligjore: “Keni parasysh se secili do të mbahet përgjegjës për veprimet e tij të paligjshme. Thirrni mendjes, ndërpriteni mbledhjen, caktoni procedurat disiplinore dhe presim vendimin e gjykatës”.
Pasi kërkesat e tyre për largimin e Qalajt nuk u morën parasysh, Shabani dhe Krasniqi braktisën mbledhjen. “Po detyrohemi të dalim. Ky është uzurpim i hapësirave dhe sjellje e papranueshme. Ju luta sinqerisht që ta largoni prej sallës, por ju vazhdoni”, deklaroi Krasniqi para se të largohej.
