Sekretari i Përgjithshëm i Federatës Evropiane të Gazetarëve, Ricardo Gutierrez, i është drejtuar kryeministrit në detyrë të Kosovës, Albin Kurti, duke i bërë thirrje të ndërpresë menjëherë fushatën e shpifjeve kundër gazetarëve, siç thotë ai, e cila po zhvillohet nga një anëtar i partisë së tij.
Sipas tij, Sami Kurteshi e ka përshkruar Asociacionin e Gazetarëve të Kosovës (AGK) si një “aleancë të grupeve kriminale”. Ai e përshkruan këtë krahasim si “skandaloz dhe të padenjë” dhe thekson se AGK thjesht po bën punën e saj: të mbrojë gazetarët dhe gazetarinë.
Gutierrez thotë se, duke toleruar deklarata të tilla, kryeministri në detyrë Kurti po dëmton gazetarët, besueshmërinë e tyre dhe vendin, duke lejuar që partia VV të denigrojë këdo që guxon t’i mbajë politikëbërësit përgjegjës.
“Turp për partinë tuaj! Ju bëj thirrje t’i jepni fund kësaj intimidimi para se të jetë shumë vonë. Kam parë shumë gazetarë të përballen me fyerje dhe sulme fizike, shumë herë pas denigrimit publik. Ju keni përgjegjësi të ndalni këto praktika të ngjashme me mafien. Përndryshe, do të jeni bashkëfajtor në to”, ka shkruar sekretari i Përgjithshëm i Federatës Evropiane të Gazetarëve.
Ky reagim vjen pasi, anëtari i VV-së në Komisionin Qendror të Zgjedhjeve, Sami Kurteshi, i ka quajtur Asociacionin e Gazetarëve të Kosovës dhe disa media “aleancë të grupeve kriminale”, ndërsa duke i përmendur disa medie në Kosovë, i ka cilësuar si “vrasës me pagesë të dinjitetit të njeriut”.
