Dy institucionet:Këshilli Prokurorial dhe ai Gjyqësor do të vendosin në mënyrë të pavarur lidhur me gjyqtarët e prokurorët në komunat veriore.
Ehat Miftaraj nga Instituti i Kosovës për Drejtësi sqaron se KPK dhe KGJK e kanë autoritetin që t`i përcaktojnë kriteret dhe procedura se si duhet të kthehen gjyqtarët dhe e prokurorët e dorëhequr në veri. Është obligim i tyre, por këto procedura dhe kritere assesi nuk duhet të bëhen subjekt i debatit publik apo politik në dialogun Kosovë-Serbi.
“Duhet të kuptojnë që sistemi gjyqësor dhe prokurorial janë të pavarur dhe të njëjtit nuk munden që sa herë t’u teket politikës në Beograd apo edhe gjyqtarëve dhe prokurorëve serb, t’i shfrytëzojnë gjyqësorin dhe prokurorinë për interesa të tyre politike, kështuqë mirë që edhe Brukseli është pajtuar me këtë fakt , prandaj kurdo që KGJK dhe KPK vlerësojnë që duhet të kthehen prokurorët dhe gjyqtarët serb është vendim i tyre por assesi të jetë marrëveshje politike mes Kosovës dhe Serbisë”, tha ai.
Kryesuesi i KGJK-së, Albert Zogaj, kohë më parë theksoi se gjyqësori ka qëndruar konsistent për zbatimin e marrëveshjes së Brukselit dhe nuk preferon një marrëveshje të dytë për integrimin e stafit serb në veri, pasi një proces i tillë do ta politizonte sistemin e drejtësisë.
“Ne nuk preferojmë të diskutohet sepse konsiderojmë që Kosovës nuk i duhet një marrëveshje e dytë e integrimit. Ajo ishte kompromisi më i madh sipas vlerësimit tonë, brenda atij konteksti mund t’i shikojmë mundësitë përndryshe në qoftë se shndërrohet në nivel diskutimi politik mund të hapen tema që do të ishin të papranueshme për ne sidomos në qoftë se do të bëheshin pjesë e sistemit
gjyqësor, njerëz që nuk kalojnë filtrin e zakonshëm qoftë të edukimit qoftë të konkurseve , provimin e jurisprudencës dhe të tjera që janë kushte për gjyqtarët”,tha ai.
Zogaj nënvizoi se rikthimi i mundshëm i gjyqtarëve dhe stafit serb duhet të ndodhë përmes kërkesës së tyre individuale dhe të vlerësohet brenda sistemit bazuar në kritere profesionale, derisa shtoi se nuk duhet të ngrihen diskutime politike për këtë çështje.
Gjyqtarët, prokurorët dhe stafi administrativ nga komuniteti serb në Gjykatën dhe Prokurorinë Themelore në Mitrovicë dhanë dorëheqje në nëntor të vitit 2022, pas vendimit të Qeverisë së Kosovës për ri regjistrimin e veturave që kishin
targa ilegale të lëshuara nga Serbia.
