Në rrugët e kryeqytetit janë vendosur më shumë se 170 kamera sigurie, përmes të cilave organet e rendit monitorojnë dhe identifikojnë në kohë reale kundërvajtjet në trafik. Ky sistem i avancuar, i vendosur me qëllim të rritjes së sigurisë publike, shërben gjithashtu edhe për zbulimin e rasteve të ndryshme penale. Sipas Drejtorisë Rajonale të Policisë, pritet që numri i kamerave monitoruese në Prishtinë të rritet.
Policia ka filluar edhe shqiptimin e gjobave ndaj kundërvajtësve në trafik, përmes monitorimit të kamerave të sigurisë që janë vendosur në rrugët e Prishtinës. Për momentin janë rreth 170 kamera, përmes të cilave mundësohet identifikimi në kohë reale i kundërvajtjeve, conform Ligjit për Rregullat e Trafikut Rrugor.
“Kamerat shërbejnë për sigurinë e përgjithshme të qytetarëve, njëkohësisht përdoren edhe për problemet në komunikacion. Njësia e trafikut rrugor në Prishtinë bën monitorimin e kamerave dhe vëzhgimin e problemeve në qytet. Ne fokusohemi edhe te kundërvajtësit, të cilëve iu shqiptojmë gjoba pas identifikimit të kundërvajtjes. Palët fillimisht kontaktohen përmes telefonit, e nëse nuk përgjigjen, kundërvajtja u dërgohet përmes postës”, tha Vedat Zuka, shef i operativës së trafikut në kryeqytet.
Ky sistem i avancuar është funksionalizuar me qëllim të rritjes së sigurisë publike në rrugët e kryeqytetit, po ashtu edhe për zbulimin e rasteve të ndryshme, gjë që nga njohës të komunikacionit shihet si hap i rëndësishëm.
“E vetmja zgjidhje në kryeqytet që të ulet numri i aksidenteve dhe i kundërvajtjeve është monitorimi në bazë të kamerave, i cili gjithashtu rrit kujdesin e vozitësve”, deklaroi Lavdim Hamiti, ekspert i komunikacionit.
Organet e rendit u bëjnë thirrje qytetarëve të jenë vigjilentë në komunikacion duke respektuar rregullat e trafikut.
