Koalicioni i OJQ-ve IKD, Lëvizja FOL dhe INPO ka nisur “Javën Kundër Korrupsionit 2025” me një grevë njëditore, duke e cilësuar atë si protestë ndaj kapjes së institucioneve dhe mungesës së reformave. Organizatat thonë se paralajmërimet e tyre për stagnim në sundimin e ligjit janë injoruar nga institucionet, ndaj greva vjen si mesazh i qartë për nevojën urgjente të veprimeve konkrete.
Koalicioni i organizatave joqeveritare – IKD, Lëvizja FOL dhe INPO, e ka nisur “Javën Kundër Korrupsionit 2025” me një grevë njëditore, të cilën e kanë paraqitur si formë proteste ndaj kapjes së institucioneve dhe mungesës së reformave në vend.
Sipas organizatave, ky vendim erdhi pas paralajmërimeve të vazhdueshme për stagnim në sundimin e ligjit, paralajmërime që, siç thanë, janë neglizhuar nga institucionet shtetërore.
Në konferencën e hapjes së aktiviteteve, hulumtuesja e IKD-së, Arrita Rezniqi, theksoi se greva synon të dërgojë një mesazh të prerë kundër politikave dhe praktikave që, sipas saj, kanë paralizuar funksionimin e shtetit.
“Ne vendosëm të hyjmë në grevë sepse, si organizata të shoqërisë civile, kemi reaguar vazhdimisht ndaj shkeljeve të ligjit, politizimit të institucioneve, stagnimit të reformave dhe kemi kërkuar me ngulm veprim kundër korrupsionit. Megjithatë, pavarësisht analizave dhe rekomandimeve të ofruara, institucionet nuk kanë treguar gatishmëri për të reflektuar apo për të ndërmarrë hapa konkretë”, u shpreh Rezniqi.
Rezniqi përmendi një sërë problemesh që sipas saj dëshmojnë për një situatë gjithnjë e më të rënduar institucionale, nga mungesa e reformës së drejtësisë e deri te presionet dhe sulmet ndaj aktorëve të ndryshëm shoqërorë.
“Mungesa e reformës së thellë në drejtësi, zvarritja e procesit të vettingut, ndërhyrjet në sistemin prokurorial, aprovimi i ligjeve që bien ndesh me Kushtetutën, mungesa e Strategjisë Kundër Korrupsionit, pezullimi i dialogut strategjik me SHBA-të, mungesa e dialogut social, si dhe sulmet ndaj gazetarëve, shoqërisë civile dhe institucioneve të drejtësisë, madje edhe bllokimi i fondeve të planit të rritjes së BE-së, përbëjnë vetëm një pjesë të problemeve që po dëmtojnë seriozisht jetën e qytetarëve dhe besimin në demokraci”, theksoi ajo.
Sipas saj, greva nuk është një akt simbolik, por një kërkesë e qartë për përgjegjësi institucionale dhe veprime të menjëhershme.
