Presidentja e Republikës së Kosovës, Vjosa Osmani, e ka uruar sot popullin e Sirisë, me rastin një vjetorit të çlirimit dhe rrëzimit nga pushteti të sundimtarit Bashar al-Assad, duke vënë theksin mbi rëndësinë e lirisë, dinjitetit dhe shpresës.
Përmes një videomesazhi të publikuar në platformën X, presidentja Osmani tha se ky përvjetor historik simbolizon rilindjen e shpresës dhe forcën e popullit sirian, i cili ka duruar sfida të mëdha, por kurrë nuk ka humbur besimin në një të nesërme më të mirë.
“Me nderim të thellë ju drejtohem sot në emër të popullit dhe institucioneve të Republikës së Kosovës, ndërsa ju shënoni këtë përvjetor historik të parë të çlirimit tuaj. Kjo është një ditë që simbolizon jo vetëm lirinë e rimarrë, por edhe rilindjen e shpresës së një populli”, tha Osmani.
Ajo theksoi se të dy vendet, Kosova dhe Siria, i kanë njohur kapitujt më të errët të shtypjes, padrejtësisë dhe vuajtjes së paimagjinueshme, por gjithashtu kanë mësuar të shndërrojnë dhimbjen në forcë dhe të qëndrojnë të palëkundur në besimin se liria nuk shuhet kurrë.
Presidentja Osmani vuri në dukje se ky është një moment historik për marrëdhëniet mes dy vendeve, duke përmendur njohjen e ndërsjellë midis Republikës së Kosovës dhe Republikës Arabe të Sirisë si një hap të ri drejt bashkëpunimit të ngushtë dhe miqësisë së qëndrueshme.
“Ne kemi qëndruar të palëkundur në besimin tonë se asnjë forcë nuk mund të shuajë dëshirën e një populli për liri. Dhe kemi mësuar se drejtësia, edhe pse e vonuar, gjithmonë e gjen zërin e saj. Për popullin e Kosovës, liria u fitua përmes kaq shumë sakrifice dhe guximi. Dhe e dimë se i njëjti shpirt e përcakton popullin e Sirisë, i cili ka duruar kaq shumë, por nuk e ka humbur kurrë besimin në një të nesërme më të mirë. Është pikërisht ky shpirt i përbashkët qëndrueshmërie, dinjiteti dhe shprese që i bashkon dy vendet tona”, ka nënvizuar Osmani.
E para e shtetit ka rikujtuar se këtë vit, filloi një kapitull i ri midis Republikës së Kosovës dhe Republikës Arabe të Sirisë, me një njohje të ndërsjellë midis dy vendeve. Kjo njohje, sipas Osamanit, është një lidhje morale mes dy popujve që e kuptojnë koston e lirisë dhe vlerën e qëndrimit krah për krah për një botë më të drejtë
“Jemi të emocionuar për atë që na pret në partneritetin tonë. Republika e Kosovës është e përkushtuar të punojë ngushtë me ju në vitet që vijnë, duke afruar dy vendet tona edhe më shumë, në miqësi dhe bashkëpunim. Të dashur miq në Siri, ju lutem dijeni se Kosova është me ju. Ne do të jemi partneri juaj, miku juaj dhe aleati juaj në çdo hap të rrugës. Nga Prishtina në Damask, zemrat tona rrahin si një e vetme, për liri, për dinjitet dhe për miqësinë e qëndrueshme midis dy vendeve tona. Gëzuar Ditën e Çlirimit”, ka përfunduar Osmani.
