Zyrtarët policorë të rajonit të Prishtinës kanë vazhduar aktivitetet e tyre operacionale gjatë javës së kaluar, duke realizuar një sërë aksionesh dhe urdhëresash gjyqësore në zona të ndryshme të kryeqytetit.
Sipas Policisë së Kosovës, gjatë kësaj periudhe janë ekzekutuar gjithsej 152 urdhëresa të gjykatës, prej të cilave 47 lidhen me vepra penale, ndërsa të tjerat për kundërvajtje, seanca gjyqësore, verifikime dhe procedura të tjera ligjore.
Personat e dënuar me burgim janë dërguar për vuajtjen e dënimit pas përfundimit të procedurave policore, ndërsa të dënuarit me gjobë janë liruar pasi kanë shlyer obligimet e përcaktuara.
Aktivitetet policore janë shtrirë edhe në fusha të tjera të sigurisë publike. “Në të njëjtën periudhë kohor janë sekuestruar 6 armë zjarri, si rezultat i kontrolleve të intensifikuara, janë shqiptuar 4,492 masa administrative, për shkelje të ndryshme të Kodit Rrugor. Nga këto, 510 gjoba janë vendosur përmes veturave inteligjente dhe atyre me radar mobil”, thuhet në njoftim .
