Presidenti i SHBA-së, Donald Trump, tha se nuk është i sigurt nëse presidenti ukrainas, Volodymyr Zelensky, do të bjerë dakord me një propozim të ri të SHBA-së që synon t’i japë fund agresionit rus në Ukrainë.
Shtetet e Bashkuara kanë folur me presidentin rus Vladimir Putin dhe zyrtarët ukrainas, përfshirë Zelenskyn, tha Trump.
Trump: Jam i zhgënjyer me Zelenskyn
“Duhet të them se jam pak i zhgënjyer që Presidenti Zelensky nuk e ka lexuar ende propozimin, kjo ndodhi disa orë më parë”, shtoi ai.
Trump vuri në dukje se Moska “do të preferonte të merrte kontrollin e të gjithë vendit… por Rusia, besoj, është dakord me këtë”, duke shtuar, megjithatë, se nuk ishte i sigurt nëse Zelensky do të pajtohej me propozimin.
Në Florida, i dërguari special i Trump, Steve Witkoff, dhe dhëndri i tij, Jared Kushner, kanë zhvilluar që nga e enjtja disa ditë bisedimesh me zyrtarë ukrainas, përfshirë ish-ministrin e Mbrojtjes Rustem Umerov dhe Shefin e Shtabit të Përgjithshëm Andriy Khnatov. Të martën, ata zhvilluan një takim pesë-orësh me Putinin në Moskë.
Në fund të bisedimeve SHBA-Ukrainë në Florida të shtunën, Zelenskiy iu bashkua bisedimeve me telefon, duke i përshkruar ato si konstruktive.
Zelensky: Amerika i di pozicionet tona themelore
“Përfaqësuesit amerikanë i dinë qëndrimet themelore të Ukrainës”, tha Zelensky në fjalimin e tij të së dielës në mbrëmje. “Biseda ishte konstruktive, megjithëse jo e lehtë”, shtoi ai.
Ende nuk dihet se si ka evoluar plani fillestar i paqes prej 28 pikash i SHBA-së gjatë tre javëve të fundit, me çështje kyçe të pazgjidhura që përfshijnë çështjet territoriale dhe garancitë e sigurisë së SHBA-së.
Moska thotë se është e hapur për bisedime dhe fajëson Kievin dhe Perëndimin për bllokimin e paqes, ndërsa Ukraina dhe aleatët e saj thonë se Rusia po zvarrit dhe po përdor diplomacinë për të konsoliduar fitimet e saj të luftës.
Zelensky është planifikuar të takohet sot në Londër me udhëheqësit evropianë, përfshirë kancelarin gjerman Friedrich Merz, kryeministrin britanik Keir Starmer dhe presidentin francez Emmanuel Macron, për të shqyrtuar statusin aktual të planit të paqes.
