Asociacioni i Komunave te Kosovës (AKK) njofton se është pjesë e një projekti prej 8 milionë euro për energji të pastër.
“Asociacioni i Komunave të Kosovës është krenar të jetë partner në projektin “Kosovo Energy Project”, një investim prej mbi 8 milionë euro nga Gjermania dhe Danimarka, që do të zbatohet deri në vitin 2028. Ky projekt sjell përfitime të drejtpërdrejta për komunat dhe për tranzicionin e gjelbër në Kosovë”, njofton AKK.
Sipas njoftimit, nga ky projekt komunat e Republikës së Kosovës do të përfitojnë: Hartimin dhe zbatimin e MECAP-ve, plane moderne të energjisë dhe klimës me asistencë teknike dhe softuerë profesionalë, ngritjen e kapaciteteve të stafit komunal për standardet e eficiencës së energjisë, mekanizma të rinj financiarë për investime në ndërtesa publike dhe objekte kolektive, në bashkëpunim me KEEF, integrim të teknologjive solare dhe masave të eficiencës në infrastrukturën komunale dhe promovimin e përfshirjes së grave në sektorin e energjisë përmes trajnimeve dhe programeve praktike.
“Roli i AKK-së në këtë projekt do të jetë koordinimi, mbështetja teknike dhe shkëmbimi i përvojave ndërmjet komunave. Ky projekt është një hap i madh drejt energjisë së pastër, kostove më të ulëta dhe komunave më të qëndrueshme në të gjithë Kosovën’, thuhet në njoftimin e AAK.
