Protestat vijnë në një kohë kur vendi po përgatitet për futjen e euros më 1 janar.
Demonstruesit përdorën lazerë për të projektuar mesazhet “Dorëheqje”, “Mafia jashtë” dhe “Për zgjedhje të ndershme” në ndërtesën e parlamentit.
Qytetarët thanë se besojnë se presioni publik do ta detyrojë qeverinë e kryeministrit Rosen Željazkov të japë dorëheqjen.
Foto: Reuters
“Më në fund është koha të kthehemi në normalitet në Bullgari dhe të heqim qafe oligarkinë, mafian dhe forcat që i përfaqësojnë ato”, tha një nga qytetarët e Sofjes.
Të enjten, parlamenti do të votojë për një mocion mosbesimi ndaj qeverisë, hera e gjashtë që kur ajo mori detyrën më 15 janar.
Foto: Reuters
Situata u përshkallëzua më tej javën e kaluar, kur qeveria tërhoqi buxhetin për vitin 2026, i pari i përgatitur në euro, pas protestave masive kundër rritjeve të planifikuara të kontributeve dhe taksave.
Partitë opozitare dhe organizata të tjera thanë se po protestonin kundër planeve për të rritur kontributet e sigurimeve shoqërore dhe taksën mbi dividentët për të financuar më shumë shpenzime qeveritare.
Foto: Reuters
Pavarësisht tërheqjes së buxhetit, protestat nuk po pakësohen. Bullgaria ka mbajtur shtatë zgjedhje në katër vitet e fundit dhe ende shprehen përçarje të thella politike dhe pakënaqësi me qeverinë.
Agjencia bullgare e lajmeve BTA raportoi të mërkurën se Boyko Borisov, ish-kryeministër dhe udhëheqës i partisë në pushtet GERB, tha se partnerët e koalicionit në pushtet kishin rënë dakord të mos jepnin dorëheqjen përpara se Bullgaria të bashkohej me eurozonën më 1 janar.
