Njësia e Hetimeve Rajonale në Gjilan, konkretisht Ekipi i Krimeve Kibernetike, ka ndërmarrë veprime hetimore pas autorizimit të Prokurorit të Shtetit, lidhur me dyshimet për veprat penale që lidhen me “Lëshimin e çeqeve pa mbulesë ose të rreme” dhe “Keqpërdorimin e kartelave bankare apo kreditit”.
Hetimet fillestare, të iniciruara më 8 dhjetor 2025, kanë çuar në sigurimin e provave të besueshme që ngarkojnë dy të dyshuar të mitur. Ata dyshohet se për një periudhë kohore kanë keqpërdorur të dhëna bankare të disa qytetarëve, përmes mashtrimit, me qëllim përfitimin material të kundërligjshëm.
Sot, më 11 dhjetor 2025, me autorizim të Prokurorit të Shtetit, policia ka kryer kontrolle në dy lokacione të ndryshme. Gjatë këtyre kontrolleve janë sekuestruar prova shtesë që, sipas policisë, forcojnë dyshimet se të miturit janë të përfshirë në veprat penale: “Lëshimi i çeqeve pa mbulesë ose të rreme dhe keqpërdorimi i kartelave bankare apo kreditit”, “Mashtrimi” dhe “Shpërdorimi i pasurisë”.
Të dy të dyshuarit janë arrestuar dhe intervistuar në përputhje me procedurat ligjore. Me vendim të Prokurorit të Shtetit, ata janë dërguar në mbajtje për 24 orë.
