Historia e Romanit 11-vjeçar për sulmin që i mori jetën nënës së tij bëri që përkthyesi të shpërthente në lot, duke ndërprerë kështu procedurat.
” Ishte hera e fundit që e pashë nënën time dhe munda t’i thoja lamtumirë ” , tha Roman Oleksiyev, gjatë një prezantimi të një dokumentari për fëmijët e Ukrainës, në Parlamentin Evropian, në Strasburg.
Përkthyesja, e ngarkuar emocionalisht, nuk mundi të vazhdonte, kështu që kolegia e saj ndërhyri dhe vazhdoi përkthimin.
“Ajo ishte nën rrënoja, mund t’i shihja flokët dhe arrita t’i prekja dhe t’i thoja lamtumirë”, vazhdon Roman.
“Dua të them se kur jemi bashkë, jemi të fortë. Dhe nuk duhet të dorëzohemi kurrë. Duhet të vazhdojmë t’i ndihmojmë fëmijët e Ukrainës”, përfundoi 11-vjeçari, ndërsa publiku shpërtheu në duartrokitje.
Historia e Romanit
Ishte 14 korriku i vitit 2022, kur një sulm me raketa ruse në qendër të Vinicës vrau 27 persona, përfshirë tre fëmijë, dhe plagosi më shumë se 200 të tjerë.
Romani, i cili kishte shkuar te mjeku me nënën e tij, ishte i vetmi që mbijetoi . Ai pësoi djegie të rënda dhe qëndroi në njësinë e kujdesit intensiv të një klinike gjermane për 99 ditë. Deri më sot, ai i është nënshtruar 36 operacioneve, ndërsa rruga drejt shërimit të plotë mbetet e gjatë.
Në vitin 2023, Romani takoi Papa Françeskun për herë të parë gjatë një audience të përgjithshme, duke i dhënë një letër përpara se ta përqafonte. Takimi i tyre i dytë u zhvillua më 25 maj 2024, në Ditën Botërore të Fëmijëve. Në shkurt 2025, dy muaj para vdekjes së Françeskut, ai u kthye në Vatikan, këtë herë pa dorezat dhe maskën që dikur i fshihnin lëndimet.
Sot, 11-vjeçari jeton me të atin, Jaroslavin, në Lviv. Ai vazhdon të luajë fizarmonikë dhe të marrë pjesë në gara vallëzimi.
Aventura e tij frymëzoi dokumentarin ( fitues të shumë çmimeve) “Romchyk”
