Një grua nga Xhorxhia po lufton për jetën me djegie të rënda, pasi një sulmues i panjohur i hodhi acid në kokë ndërsa po ecte në një park në qytetin e Savannah, konfirmuan për mediat amerikane djali i saj dhe një mik i ngushtë.
Policia thotë se po kërkon intensivisht një të dyshuar për një sulm kimik që ndodhi të mërkurën në mbrëmje në Parkun Forsyth, një nga hapësirat e gjelbra më të famshme të qytetit historik. Raportet fillestare sugjerojnë se viktima është sulmuar nga një i panjohur.
Viktima, 46-vjeçarja Ashley Wasielewski, po trajtohet në një qendër djegiesh në Augusta për djegie të shkallës së dytë dhe të tretë, konfirmoi për Associated Press djali i saj, Westley Wasielewski. Ai tha se lëndimet mbulojnë pothuajse gjysmën e trupit të saj, duke përfshirë lëkurën e kokës, fytyrën, krahët dhe këmbët.
“Nuk e dimë kush e bëri,” tha ai. “Ajo nuk ka armiq. Është mike e të gjithëve.”
Ai iu afrua nga mbrapa.
Westley Wasielewski tha se nëna e tij po shëtiste në park të mërkurën në mbrëmje pas një programi Krishtlindjesh në një kishë aty pranë. Ai mësoi për sulmin kur u telefonua nga një kalimtar i cili ishte i pari që ndihmoi, dhe ai thotë se mundi të dëgjonte britmat e saj të agonisë në telefon.
Nga shtrati i spitalit, Ashley u tregoi familjes dhe miqve se si po ecte përgjatë trotuarit buzë një parku kur vuri re një hije që po i afrohej nga pas. Ajo u kthye për të parë se kush ishte dhe më pas sulmuesi i derdhi lëng në kokë, tha miku i saj i ngushtë Connor Milam.
“Ajo menjëherë mendoi, ‘Pse po më derdh ujë?’ Dhe pastaj lëkura e saj filloi të digjej”, tha Milam. “Ajo shikoi poshtë dhe pantallonat e saj filluan të shkriheshin. Ajo filloi të bërtiste.”
Policia publikoi pamjet filmike
Zëdhënësi i policisë së Savannah-s, Neil Penttila, tha se detektivët po punojnë me FBI-në për të identifikuar acidin e përdorur në sulm. Djali i viktimës tha se acidi ishte aq gërryes saqë shkriu një çelës makine që nëna e tij e kishte në xhep.
Shefi i policisë Lenny Gunther konfirmoi se patrullat e policisë janë shtuar në të gjitha parqet e qytetit. Policia ka publikuar pamjet e kamerave të sigurisë dhe është duke kërkuar burrin që shihet në to, por thotë se ai nuk është i dyshuar për momentin.
Ajo donte që historia e saj të dëgjohej.
Djali dhe miku i viktimës thanë se Ashley donte të ndante historinë e saj me shpresën se dëshmitarët do të paraqiteshin me informacione që mund të çonin në arrestim.
Miku i saj, Milam, e përshkroi Ashley-n si një person bujar që punon si vullnetare në një qendër lokale natyre dhe përgatit pako me ushqime dhe furnizime për të pastrehët. Të gjithë ata që e njohin janë të shokuar dhe të hutuar nga ky akt i pakuptimtë.
“Ata nuk e grabitën. Ata nuk i morën asgjë”, tha Milam. “Ky ishte një person i rastësishëm në park që bëri çmos për të gjymtuar një qenie tjetër njerëzore”, shtoi ajo.
