Partia Demokratike e Kosovës fushatën e saj elektorale për zgjedhjet e parakohshme sot e ka vazhduar edhe në Fushë Kosovë. PDK atje premtoi anëtarësim në BE dhe NATO si dhe zhvillim ekonomik e mirëqenie për qytetarët.
Kandidati i PDK-së për kryeministër, Bedri Hamza, në Fushë Kosova tha se programi i tij qeverisës mbështetet në disa shtylla të cilat garantojnë ecje përpara në aspektin ekonomik si dhe siguri e stabilitet për të gjithë qytetarët.
“Do ta krijojmë fondin prej papunësisë më qëllim që ti ruajmë, për gjashtë muaj shteti ua garanton 80 përqind të pagës. Gjykatën e Punës me qëllim të mbrojtjes të të drejtave të punës, pako të veçantë për gratë në biznes, për lehona pako të veçantë e cila do ti mbështetë nënat e reja dhe mbështetje për fëmijët, të gjithë fëmijët deri në moshën 16 vjeçare. Do ti përfundojmë autostradat, do ti nisim të reja. Shtyllë e dytë arsimi dhe shëndetësia, digjitalizimi i sistemit arsimor. 30 milionë euro bursa për të reja e të rinj”, tha ai.
Hamza premtoi edhe rritje të pensioneve prej 50% për familjet e dëshmorëve dhe veteranët e UÇK-së.
“Do të rrisim 50 përqind pensionet e veteranëve pa iu mohuar e drejta të punojnë në sektorin privat. Rritje të pagave në sektorin publik prej 50 përqind”, shtoi ai.
Në Fushë Kosovë Partia Demokratike e Kosovës prezantoi edhe dy kandidatët e kësaj ane për deputetë dhe ftoi qytetarët që t’i votojnë ata e PDK-në.
