Kandidati i Partisë Demokratike të Kosovës për kryeministër, Bedri Hamza, u ka kërkuar mbështetjen gjilanasve për zgjedhjet e 28 dhjetorit.
Hamza u zotua për projekte në arsim, barna falas për pacientët dhe sigurime shëndetësore. Ai tha se do ta përkrahin edhe drejtësinë.
“Më shumë çerdhe, digjitalizim të sistemit arsimor, reforma dhe krijim të fondit për bursa për studentë, që asnjë vajze e djali të mos i ndërpritet ëndrra për studime. Në shëndetësi, sigurimet shëndetësore do t’i bëjmë në fillim të mandatit”, deklaroi ai.
Pensionistëve, Hamza u premtoi rritje pensionesh, e tha se 50 për qind më shumë do të ketë rritje edhe për veteranët e UÇK-së.
“Programi ynë në fokus e ka qytetarin. Ne do t’i rrisim pensionet. Do të ketë 50 për qind edhe rritje të pensioneve për familjet e dëshmorëve dhe invalidëve të luftës. Ata do të kenë kujdesin e shtetit edhe për trajtimin e tyre”, shtoi ai.
Gjilani përfaqësohet nga 5 kandidatë për deputetë në listën e PDK-së.
