Kryeministri në detyrë, Albin Kurti vitin 2025 e ka quajtur vit të njohjeve të reja. Kurti thotë se Bahamas bëhet vendi i katërt që e njeh Kosovën shtet të pavarur e sovran, brenda këtij viti. Ai i ka shprehur mirënjohje presidentes së shtetit, Vjosa Osmani e partnerëve të Kosovës për këtë njohje.
“Viti 2024 ishte viti i pasaportës sonë. Viti 2025 është viti i njohjeve të reja, pas një kohe të gjatë. Bahamas bëhet shteti i katërt sivjet dhe i 121-ti që e njeh Republikën tonë si shtet të pavarur dhe sovran. Urime të gjithë qytetarëve dhe një mirënjohje e veçantë për presidenten tonë, Vjosa Osmani, zyrtarët shtetërorë dhe partnerët tanë për një tjetër arritje në forcimin e subjektivitetit tonë ndërkombëtar”, ka shkruar kreu në detyrë i qeverisë pas njohjes nga Bahamas që mori sot Kosova .
Kurti thotë se Kosovës po i shtohen miqësitë e reja dhe, bashkë me to, sipas tij, edhe mundësitë e bashkëpunimit.
“Mezi presim që njohjen e ndërsjellë ta kthejmë në partneritet të sinqertë me shtetin dhe popullin e Bahamas”, shkroi kreu në detyrë i qeverisë.
