Lidhja Demokratike e Kosovës ka shpalosur programin e saj qeverisës në Pejë, nga ku ka kërkuar mbështetje për kandidatin e saj për kryeministër, Lumir Abdixhiku.
Në këmbim të votës, Abdixhiku u zotua se, nëse i besohet qeverisja e vendit, do të punojë në realizimin e kërkesave të qytetarëve. Ai potencoi se në fokus kanë qytetarin dhe familjen.
Rrugën Prishtinë-Pejë, parkun milionësh të turizmit, mësimin tërë ditor dhe projekte të tjera u ka premtuar pejanëve kandidati i LDK-së për kryeministër, Lumir Abdixhiku.
“Kur jam në Pejë, zotohem për dy projekte. E para, rruga Prishtinë-Pejë. Zotohem se do të përfundojë brenda vitit të parë të qeverisjes sonë. Dhe parkun e turizmit. Janë 50 milionë euro investime nga qeveria e LDK-së”, ka thënë Abdixhiku.
Në tubimin e mbajtur në këtë komunë, Abdixhiku tha se LDK vjen me një plan ndryshe dhe me njerëz të kualifikuar në fusha të ndryshme.
“LDK vjen ndryshe, vjen me plan, përvojë dhe njerëz. Ne kemi 110 kandidatë dhe zotime konkrete. Bëhuni gati për mësimin tërë ditor. Atë që e bëmë në Prishtinë do ta bëjmë edhe në Pejë dhe komunat e tjera. Ne e dimë se shteti nuk funksionon pa njerëz që e mbajnë atë në këmbë. Në qeverisjen tonë pagat do të rriten fuqishëm. Paga e mësuesit do të bëhet 1 mijë euro në muaj, ndërsa e ushtarit dhe zjarrfikësit 900 euro”, ka premtuar kreu i LDK-së.
Abdixhiku tuje tha se LDK është shpresa e parë dhe e fundit për Kosovën.
Ai tha se në Pejë fjala politike ka pasur gjithmonë peshë dhe se angazhimi ka qenë gjithmonë bindje, e jo interes.
Ai po ashtu ka thënë Peja në listën e LDK-së përfaqësohet nga një ekip i fuqishëm kandidatësh, me vlera të dëshmuara profesionale, akademike dhe qytetare si: Kujtim Shala; Gëzim Kasapolli; Fatmir Asllani; Sadri Berisha; Diellëza Berisha; Agime Lajqi dhe bashkatdhetari nga Austria, Besart Berisha.
