Presidentja e Kosovës, Vjosa Osmani, në një deklarim për media, pas takimit me zëvendës Sekretarin e Shtetit të Shteteve të Bashkuara të Amerikës, Christopher Landau, gjatë qëndrimit të saj në Uashington, tha se ka besim të plotë te presidenti Trump.
“Sapo përfunduam një takim të shkëlqyeshëm me zëvendëssekretarin e shtetit, zotin Landau. Është takimi ynë i dytë gjatë këtij viti dhe jemi mirënjohës për kohën e ndarë për Republikën e Kosovës, në mënyrë që të diskutojmë një sërë çështjesh, nga bashkëpunimi ynë i afërt në temat e paqes dhe sigurisë, e deri te temat e bashkëpunimit ekonomik dhe integrimit euro-atlantik të vendit tonë”, tha ajo.
Osmani ia ka shprehur falënderimet e popullit të Kosovës për ligjin që sapo ka nënshkruar presidenti Trump, në të cilin përfshihet edhe Republika e Kosovës dhe jo vetëm kaq, por në veçanti thuhet se nuk do të ketë ndryshim të kufijve.
“Prandaj mbrohet integriteti territorial dhe sovraniteti i vendit tonë. Qartësohet se dialogu me Serbinë duhet të bazohet në njohje reciproke, përkrahet anëtarësimi ynë në NATO, si dhe investimet strategjike në fushën e ekonomisë. Diskutuam edhe për një sërë çështjesh të tjera, për të cilat është e domosdoshme të kemi koordinim të plotë dhe të vazhdueshëm me Shtetet e Bashkuara të Amerikës, si aleati ynë më i rëndësishëm strategjik, dhe të nëjtën kohë për hapat përpara dhe veprimet që duhet t’i ndërmarrim, në mënyrë që dialogu strategjik me Shtetet e Bashkuara të Amerikës të rikthehet”, tha ajo.
E para e vendit tha se Kosova ka besim të plotë në administratën Trump.
“Jemi ndër një nga shtetet e para që kemi përkrahur një sërë veprimesh të ndërmarra nga presidenti Trump, kontributi i të cilit për paqen dhe stabilitetin në gjithë rajonin tonë është i domosdoshëm dhe ka qenë i vazhdueshëm”, tha ajo.
Presidentja e Kosovës, Vjosa Osmani, tha se kjo është ndalesa e saj e fundit në një sërë udhëtimesh që kishte, nga audiencat private me Papën Leonin e deri te heqja e masave nga ana e Bashkimit Evropian, ku ishte në Samitin për Ballkanin Perëndimor.
Ajo foli edhe për njohjen nga shteti i Bahamas, vendosjen e marrëdhënieve diplomatike dhe, po ashtu, arritjen e marrëveshjes me kryeministrin e Bahamas, për heqjen e e vizave mes dy vendeve.
