Komandanti i Forcës së Sigurisë së Kosovës, Gjenerallejtënant Bashkim Jashari, ka përcjellë urime për festat e fundvitit, duke iu drejtuar qytetarëve të Republikës së Kosovës, pjesëtarëve të FSK-së si dhe besimtarëve të krishterë.
Me rastin e Krishtlindjeve katolike, Vitit të Ri dhe Krishtlindjeve ortodokse, Jashari ka uruar shëndet, paqe, mirësi dhe begati në familjet e të gjithë qytetarëve, duke theksuar rëndësinë e këtyre festave si momente reflektimi, shprese dhe afrimi njerëzor.
Ai ka vlerësuar solidaritetin, respektin e ndërsjellë dhe bashkëjetesën ndërmjet qytetarëve, duke ritheksuar përkushtimin e Forcës së Sigurisë së Kosovës për të shërbyer me profesionalizëm, integritet dhe përgjegjësi ndaj vendit.
“Dua të falënderoj secilin prej jush për angazhimin dhe profesionalizmin e treguar. Na keni bërë krenarë me punën dhe përkushtimin tuaj”, ka thënë Jashari.
Në përfundim, komandanti i FSK-së ka uruar festa të gëzuara të fundvitit dhe një Vit të Ri të mbarë, plot suksese dhe shëndet për të gjithë qytetarët.
“Qoftë një vit i mbarë për të gjithë. Gëzuar festat e fundvitit dhe Gëzuar Vitin e Ri 2026!”, ka përfunduar Jashari.
