Festimet pas fitores së Lëvizjes Vetëvendosje (LVV) në zgjedhjet e parakohshme parlamentare kanë nisur në kryeqytet dhe po vazhdojnë në disa qytete të Kosovës.
Në Prishtinë, qindra qytetarë u mblodhën para selisë së LVV-së, me brohoritje, muzikë festive dhe valëvitje të flamujve kombëtarë. Atmosfera ishte festive dhe entuziaste, ndërsa festimet u zhvilluan në mënyrë paqësore.
Festime të ngjashme po zhvillohen edhe në Prizren. Në Shadërvan, përkrahësit e Vetëvendosjes janë mbledhur duke festuar me daulle e surla, këngë, valle dhe brohoritje, duke krijuar një atmosferë festive në qendrën historike të qytetit. Simpatizantët kanë marshuar edhe nëpër disa rrugë të qytetit.
Policia e Kosovës është e pranishme si në Prishtinë ashtu edhe në Prizren, për të siguruar mbarëvajtjen e rendit dhe sigurisë, ndërsa deri më tani nuk janë raportuar incidente.
Atmosferë festive është vërejtur edhe në komuna të tjera të vendit, ku qytetarët po festojnë me këngë, valle dhe fishekzjarre.
Kryetari i Lëvizjes Vetëvendosje, Albin Kurti, ka falënderuar qytetarët për mbështetjen, duke theksuar se këto festime janë shprehje e besimit dhe shpresës për vazhdimin e ndryshimeve në vend.
