Agjencia e Menaxhimit Emergjent ka thënë se në shumicën e komunave ku pati vërshime gjendja është e qetë, ndërkaq njoftoi që në Gjakovë u evakuuan mbi 20 familje.
“Në Gjakovë është kërkuar ndihmë për evakuimin e mbi 20 familjeve, në koordinim me FSK-në. Në shumicën e komunave të tjera, gjendja është relativisht e qetë dhe stabile, në monitorim të vazhdueshëm”, thuhet në reagimin e AME-së.
Ata kanë njoftuar se rajonet më të prekura janë Fushë Kosova, Drenasi, Malishevë, Rahoveci, Klina, Mitrovica, Vushtrria, Skënderaj dhe Gjakova, duke përfshirë vërshime në oborre, bodrume dhe rrugë të caktuara.
“Të gjitha ekipet e forcave te Mbrojtjes dhe Shpëtimit ,janë në terren dhe situata po monitorohet vazhdimisht nga sistemi i komunikimit emergjent Agjencisë Menaxhimit Emergjent”, njofton AME.
AME u bëri apel qytetarëve që të mos kalojnë në zona të veshura, të raportojnë për çdo rrezik, dhe të ndjekin vetëm njoftimet zyrtare.
