Klisman Kadiu, këshilltar i zëvendëkryeministrit në detyrë, njëherësh kryenegociatorit të Kosovës për dialogun me Serbinë, Besnik Bislimi, ka mohuar raportimet se shefi i tij ka pasur takim të fshehtë me Marko Gjuriqin në Zvicër.
“Procesi i dialogut mes Kosovës dhe Serbisë është i gjerë dhe përfshin shumë akterë ndërmjetësues. Krahas BE-së, ka edhe vende partnere e mike të cilat organizojnë iniciativa të ndryshme për ndërmjetësim mes palëve. E tillë është edhe Zvicra, që e bën këtë përmes Departamentit për Punë të Jashtme, dhe organizon çdo vit takime me shoqëri civile, ekspertë, politikanë dhe qeveritarë nga të dy shtetet. Shprehim mirënjohjen ndaj Zvicrës për angazhimin dhe përkushtimin e saj”, ka shkruar Kadiu.
Por, sipas tij, këto takime nuk janë të fshehta. Ai thotë se zëvendëskryeministri i parë Besnik Bislimi, nuk ka pasur takime të fshehta, e aq më pak me Marko Gjuriqin.
“Në njërin nga këto takime në Zvicër, ka qenë i ftuar si folës edhe zëvendëskryeministri, por në atë takim nuk ka qenë pjesëmarrës Gjuriq. Pra, zëvendëskryeministri Bislimi, nuk ka patur asnjë takim në Zvicër me Marko Gjuriq dhe kurrë nuk e ka takuar atë”, ka shkruar Kadiu.
