Kryetari i Komunës së Fushë Kosovës, Valon Prebreza, ka marrë vendim për ngritjen e Shtabit Emergjent për Mbrojtje dhe Shpëtim, në kuadër të menaxhimit të situatës emergjente dhe përballimit të pasojave nga fatkeqësitë natyrore.
Sipas njoftimit, Shtabi Emergjent do të veprojë për menaxhimin e situatave në raste të reshjeve, vërshimeve, përmbytjeve, zjarreve, tërmeteve, rrëshqitjeve të dheut dhe fatkeqësive të tjera eventuale, në përputhje me ligjin dhe aktet përkatëse.
Në kuadër të gjendjes emergjente, Komuna e Fushë Kosovës ka njoftuar edhe për shpërndarjen e ujit të pijshëm për qytetarët në zonat e prekura. Me vendim të kryetarit, janë siguruar 14 paleta, përkatësisht 728 bidona me ujë të pijshëm, të cilat do të shpërndahen sot, më 07 janar 2026, nga ora 17:00.
Shpërndarja do të realizohet në Rrugën Dardania (tek hyrja e lagjes Britania Homes), SHFMU “Mihal Grameno”, parkingun e Komunës, lagjet 28 dhe 29 (tek komuniteti ashkali) si dhe në Çerdhen Publike “Gëzimi Ynë”.
Komuna u ka bërë apel qytetarëve të shmangin zonat e përmbytura dhe të raportojnë çdo situatë që paraqet rrezik për sigurinë publike në numrat: 193 – Zjarrfikësit, 192 – Policia, 112 – Emergjencat dhe +383 49 797 518 – Drejtoria për Shërbime Publike.
