Presidentja e Republikës së Kosovës, Vjosa Osmani, ka qëndruar sot për vizitë në Gjakovë, pas vërshimeve të shkaktuara nga reshjet e shumta të shiut që kanë përfshirë vendin në tërësi, e veçanërisht këtë komunë.
Gjatë vizitës, presidentja Osmani ka takuar kryetarin e Komunës së Gjakovës, Ardian Gjini, si dhe me ekipin e tij, të cilët janë duke monitoruar situatën dhe duke menaxhuar gjendjen emergjente në terren. Po ashtu, ajo ka viituar familjet e prekura nga përmbytjet, si dhe disa lokacione që vazhdojnë të jenë në situatë të rënduar.
Osmani ka potencuar, mes tjerash, se familjet e prekura nga kjo situatë do të kenë mbështetjen e institucioneve të vendit.
Ajo ka falënderuar institucionet qendrore dhe lokale për angazhimin e pandërprerë, kryetarin e Komunës së Gjakovës, si dhe qytetarët që kanë treguar solidaritet, me qëllim të tejkalimit sa më të lehtë të kësaj situate.
E kryetari i Komunës së Gjakovës, Ardian Gjini, ka njoftuar se gjatë vizitës së presidentes Osmani ai e ka informuar atë për situatën në terren, për veprimet e Shtabit Emergjent dhe për masat që po ndërmerren për të mbrojtur qytetarët.
Ai ka theksuar se disa familje kanë qenë të detyruara të evakuohen, veçanërisht në lagjen Dardania, dhe se banesat sociale po shfrytëzohen për të strehuar përkohësisht të evakuuarit. Gjini ka shtuar se ekipet komunale janë të pranishme në terren dhe po veprojnë pa ndërprerje për të menaxhuar situatën deri në normalizimin e plotë të gjendjes.
