Në ditën kur po shënohet përmirësim i situatës pas vërshimeve, kryetari i Komunës së Drenasit, Ramiz Lladrovci, ka falënderuar donatorët, kompanitë dhe qytetarët për solidaritetin dhe ndihmën e dhënë në lehtësimin e gjendjes.
Lladrovci ka vlerësuar lart kontributin vullnetar të donatorëve, të cilët kanë ofruar pako ushqimore, strehim dhe transport për familjet e dëmtuara, si dhe angazhimin për hapjen e kanaleve dhe rrugëve për qarkullim gjatë vërshimeve.
Duke iu përgjigjur pyetjeve të qytetarëve lidhur me kompensimin e dëmeve, ai ka bërë të ditur se kërkesat për kompensim parashtrohen në Komunë, pranë Komisionit për vlerësimin e dëmeve nga zjarri dhe fatkeqësitë e tjera.
“Kemi pasur mbështetje të madhe nga qytetarët, zyrtarët dhe kompanitë që kanë shprehur solidaritet dhe gatishmëri për të ndihmuar deri në normalizimin e plotë të gjendjes”, ka deklaruar Lladrovci.
Ai ka theksuar se gjatë vërshimeve Komuna nuk ka kërkuar ndihmë nga niveli qendror, pasi situata është përballuar me kapacitetet lokale, por ka shtuar se tashmë po kërkohet përkrahje për kompensimin e dëmeve të shkaktuara në pronat private dhe kompanitë e dëmtuara.
Sipas tij, Komisioni komunal për vlerësimin e dëmeve do ta kryejë detyrën me përgjegjësi, ndërsa kompensimi i dëmeve mbetet obligim i nivelit qendror, në përputhje me procedurat ligjore.
