Një person është arrestuar pasditen e së premtes në Ferizaj, nën dyshimin për sulm ndaj zyrtarëve policorë gjatë kryerjes së detyrës zyrtare.
Sipas njoftimit të Policisë Rajonale të Ferizajt, rreth orës 15:40, një zyrtar policor i vendosur në portën hyrëse të stacionit policor kishte vërejtur një veturë me targa të huaja të parkuar para portës hyrëse, ndërkohë që shoferi i saj nuk po i bindej urdhrave për t’u larguar.
Në vendngjarje kanë dalë për asistencë edhe zyrtarë të tjerë policorë, ndërsa i dyshuari A.N. (35 vjeç) ka përdorur fjalë fyese dhe kanosëse ndaj policëve, duke shfaqur sjellje agresive dhe mosbindëse.
Gjatë ndërhyrjes policore, i dyshuari u është vërsulur zyrtarëve policorë, me ç’rast ata janë detyruar të përdorin sprej mbrojtës dhe ta arrestojnë atë.
Si pasojë e incidentit, tre zyrtarë policorë dhe i dyshuari kanë pësuar lëndime të lehta.
“Në rast është kyçur Njësia e Hetimeve Rajonale dhe, me urdhër të prokurorit të shtetit, është iniciuar rasti “Sulm ndaj personit zyrtar”, ndërsa i dyshuari është dërguar në mbajtje për 48 orë për procedura të mëtejme hetimore”, thuhet në njoftim.
Policia Rajonale e Ferizajt ka apeluar tek qytetarët që të respektojnë urdhrat e ligjshme të zyrtarëve policorë, duke theksuar se bashkëpunimi me policinë është i domosdoshëm për ruajtjen e rendit dhe sigurisë publike.
