Instituti Kombëtar i Shëndetësisë Publike të Kosovës (IKSHPK) ka njoftuar se pas reshjeve të shtuara të shiut dhe vërshimeve të ditëve të fundit, janë intensifikuar monitorimet e cilësisë së ujit të pijshëm në të gjithë territorin e vendit.
Sipas njoftimit, janë marrë mostra për analiza fiziko-kimike dhe mikrobiologjike nga sistemet publike të ujëfurnizimit, në bashkëpunim me Qendrat Rajonale të Shëndetit Publik.
“Si pasojë e reshjeve të shtuara atmosferike ditët e fundit, IKSHPK ka intensifikuar monitorimin e cilësisë së ujit të pijshëm në të gjithë territorin e Republikës së Kosovës”, thuhet në komunikatën e institutit.
IKSHPK bën të ditur se në rajonin e Prishtinës, fabrikat për trajtimin e ujit në Shkabaj dhe Bivolak janë jashtë funksionit për shkak të turbullirës së madhe, ndërsa fabrikat në Badoc dhe Batllavë funksionojnë normalisht dhe uji është brenda standardeve të lejuara për pije.
Në rajonin e Prizrenit, burimi i ujit nga “40 bunarët” përdoret vetëm për nevoja teknike, ndërsa burimet Cvilen dhe Soz, si dhe uji në Suharekë dhe Dragash, janë brenda standardeve. Në Malishevë, uji përdoret vetëm për nevoja teknike.
Në rajonin e Gjilanit, uji në qytetin e Gjilanit është i pijshëm, ndërsa në Kamenicë, Viti dhe në fshatrat Makresh, Ropotovë, Ranillug dhe Berivojcë, vlerat e turbullirës janë të rritura dhe uji nuk rekomandohet për pije.
Sipas IKSHPK-së, në rajonin e Pejës, uji në qytetin e Pejës dhe Istogut është brenda standardeve, ndërsa në Deçan, Junik dhe Klinë, furnizimi me ujë është vetëm për përdorim teknik. Edhe në Mbivadë, Vrellë dhe në burimin e Jarinës, uji shfrytëzohet vetëm për nevoja teknike.
Në rajonin e Ferizajt, uji është i pijshëm dhe brenda standardeve, ndërsa në rajonin e Gjakovës, furnizimi nga rrjeti i KRU Gjakova konsiderohet i sigurt për pije. Megjithatë, në Hoçë të Madhe, Opterushë dhe Zaqisht, vlerat e turbullirës janë të rritura dhe uji nuk është i pijshëm.
Ndërkaq, në rajonin e Mitrovicës, uji përdoret vetëm për nevoja teknike.
IKSHPK ka bërë të ditur se do të vazhdojë monitorimin e shtuar të cilësisë së ujit në koordinim me Qendrat Rajonale të Shëndetit Publik dhe Kompanitë Rajonale të Ujësjellësit.
“Monitorimi i vazhdueshëm ka për qëllim mbrojtjen e shëndetit të popullatës”, thuhet në njoftimin e institutit.
