Kryeministri në detyrë, Albin Kurti, ka kujtuar 42-vjetorin e rënies së Rexhep Malajt dhe Nuhi Berishës, dy veprimtarë të shquar të lëvizjes politike dhe kombëtare shqiptare.
Ai ka vizituar edhe familjet e heronjve Malaj dhe Berisha në Gjilan.
“Rexhep Malaj ishte anëtar dhe udhëheqës i organizatës së fshehtë Lëvizja për Republikën Shqiptare në Jugosllavi (LRSHJ), kurse Nuhi Berisha ishte udhëheqës i Shtabit Operativ të LRShJ-së për Universitetin e Prishtinës. Mbrëmjen e 11 janarit 1984, policia jugosllave ndërmori një aksion për kapjen e Rexhepit dhe Nuhiut, duke i rrethuar në një shtëpi ku ata ishin strehuar, në lagjen Kodra e Trimave në Prishtinë. Rexhepi dhe Nuhiu rezistuan me armë, dhe pas mesnate u vranë të dy. Rënia e tyre si angazhim dhe luftë për liri deri në flijim, u përjetua si shembull ideal nga shokët aktivistë dhe nga populli shqiptar, në Kosovën e pushtuar nga Serbia nën Jugosllavi”, thuhet në komunikatë.
