Mot tipik dimëror me temperatura nën zero dhe reshjet e borës e kanë përfshirë pothuajse gjithë rajonin. Të dielën pritet depërtimi i masave të ftohta me origjinë polare, ndërsa parashikohet të mbajë mot me vranësira të herëpashershme dhe intervale me diell.
Gjatë ditës, sipas Meteo Ballkan, nuk përjashtohen reshje të izoluara bore, ndërsa reshjet më të theksuara parashikohen gjatë orëve të para të 24-orëshit, kryesisht në sasi të pakta.
Temperaturat do të shënojnë rënie të ndjeshme. Vlerat minimale do të lëvizin nga -4 deri në -2°C, ndërsa maksimalet nga -2 deri në 1°C. Gjatë orëve të pasdites pritet rënie e mëtejshme e temperaturave.
Era do të fryjë kryesisht nga veriu, herë pas here e fuqishme, me shpejtësi nga 15 deri në 47 km/h.
Në Shqipëri, Maqedoninë e Veriut, Luginën e Preshevës dhe Malin e Zi, dita e diel do të karakterizohet nga erëra të ftohta veriore dhe ulje të temperaturave. Megjithatë, do të ketë intervale kohore me diell, si dhe vende-vende reshje të pakta bore. Në orët e mbrëmjes pritet acar i fortë.
E hëna do të jetë një ditë shumë e ftohtë, me temperatura që në pjesën më të madhe të rajonit nuk do të kalojnë në vlera pozitive, përjashtimisht në disa zona mesdhetare të Shqipërisë.
