Rusia po i përdor afrikanët si “mish për top”, duke i mashtruar ata që të bashkohen me luftën në Ukrainë, tha ambasadori ukrainas në Afrikën e Jugut.
Besohet se mijëra afrikanë janë joshur në vijën e frontit – qoftë nga premtime të rreme apo histori për paga bujare – në një operacion rus për të mbushur radhët e veta.
Oleksandr Shcherba i tha gazetës The Telegraph se skandali i fundit, në të cilin anëtarë të një partie politike të Afrikës së Jugut, e afërt me Moskën, përfunduan në operacione luftarake në Ukrainë, është provë e qartë se Kremlinit as nuk i interesojnë aleatët e vet.
Në një intervistë në Ambasadën e Ukrainës në Pretoria, ai tha:
“Mund të kesh të gjitha llojet e ofensivave simpatike në Afrikë, por në momentin që një afrikan hyn në këtë luftë, ai bëhet thjesht mish në mullirin e mishit.”
Shcherba shtoi se rasti tregon se si Rusia “e shikon Afrikën me sy imperialë”. Disa vende afrikane i kanë paralajmëruar qytetarët e tyre në muajt e fundit për mashtrimet që ofrojnë vende pune ose studime në Rusi.
Paralajmërimi i ambasadorit vjen ndërsa në internet shfaqen video të shumta që dyshohet se tregojnë abuzimin e ushtarëve afrikanë nga oficerët rusë.
Njëri prej tyre tregon një mercenar afrikan me një minë anti-personel të lidhur në gjoks, teksa detyrohet të kalojë nëpër një hendek nën kërcënimin e armës dhe i urdhërohet të sulmojë pozicionet ukrainase.
Një ushtar rus, duke përdorur fyerje raciste, i thotë një rekruti se po përdoret si “hapës kanaçesh” – për të vrapuar nëpër pyll dhe për të hedhur veten në erë për të “hapur” një bunker armik.
Një video tjetër, e publikuar të dielën, thuhet se tregon një grup mercenarësh të rinj afrikanë në një pyll të mbuluar me borë duke kënduar në gjuhën e tyre. Një ushtar rus që filmon videon komenton: “Shikoni sa shumë materiale të konsumueshme ka”.
Duke qeshur me ushtarët e gëzuar, ai shton se ata do të “këndojnë ndryshe” kur të arrijnë në vijën e frontit.
Afrika e Jugut është tronditur javët e fundit nga rasti i 17 burrave që dyshohet se u joshën në Rusi për trajnimin e truprojave, me ndërmjetësimin e Duduzila Zuma-Sambudla , vajzës së ish-presidentit të kompromentuar Jacob Zuma.
Burrat u thanë gazetarëve se besonin se pas trajnimit do të ktheheshin në punë në njësinë e mbrojtjes së partisë Mkhonto Wesizwe (MK), e cila drejtohet nga Zuma.
Në vend të kësaj, ata u detyruan të nënshkruanin kontrata me ushtrinë ruse, u dërguan në vijën e frontit dhe janë ende atje – pavarësisht faktit se ish-presidenti, i njohur për lidhjet e tij të ngushta me Moskën, iu lut personalisht autoriteteve ruse t’i lironin.
